၂။ ကိန်းဂဏန်းနှင့် တွေ့ရှိချက်များ

ဘယ်လိုပြန်သုံးသပ်ထားသလဲ

ဒီမိုကရေစီ အမေး အဖြေ ၈၀ ကို တစ်ခုချင်းစီ တင်ဆက်ခဲ့စဉ်တစ်လျှောက် တစ်ပုဒ်ချင်းစီမှာ-

  • ပြန့်နှံ့ရောက်ရှိမှု (reach) နဲ့ တုံ့ပြန်ပါဝင်မှု (engagement) တို့အပြင် နှစ်သက်မှု (like)၊ ပြန်လည်မျှဝေမှု (share) နဲ့ မှတ်ချက် (comment) ပေးမှုတွေ ဘယ်လောက်ရကြသလဲဆိုတာ စာရင်းပြုစုပါတယ်

  • ဘယ်အကြောင်းအရာတွေကို တင်ဆက်ရာမှာ ပြန့်နှံ့ရောက်ရှိမှုနဲ့ တုံ့ပြန်ပါဝင်မှုတွေ၊ နှစ်သက်မှု၊ ပြန်လည်မျှဝေမှုနဲ့ မှတ်ချက်ပေးမှုတွေ အများဆုံး/အနည်းဆုံး ရသလဲ ဆန်းစစ်ပါတယ်

  • အဲဒီနောက် ဒီမိုကရေစီ အမေး အဖြေ ၈၀ ရဲ့ ရည်ရွယ်ချက်နဲ့ လက်တွေ့ရလဒ်တွေအရ (က) ဆီလျော်မှု၊ (ခ) ထိရောက်မှု၊ (ဂ) သက်သာမှု၊ (ဃ) သက်ရောက်မှု၊ (င) အရှည်တည်တံ့မှု ဘယ်လောက်ရှိသလဲဆိုတာ ပြန်လည်သုံးသပ်ပါတယ်။

ဒီအတွက် အချက်အလက်တွေကို ၂၀၂၀ မေလ ၂၅ ရက်နေ့မှာ ကောက်ယူခဲ့ပါတယ်။

မြန်မာနိုင်ငံမှာ လူဦးရေ ၂၁ သန်းကျော် အသုံးပြုနေတဲ့ Facebook လူမှုကွန်ရက်မှာ ဒီမိုကရေစီနဲ့ နိုင်ငံသား အသိပညာတွေကို တင်ဆက်ဖော်ပြတဲ့အခါ စိတ်ဝင်စားတဲ့သူတွေရော စိတ်မဝင်စားတဲ့သူတွေပါ ရှိပါတယ်။

အားလုံးခြုံငုံစစ်ဆေးကြည့်ရာမှာ တင်ဆက်မှု ၈၀ လုံးဟာ ပြန့်နှံ့ရောက်ရှိမှု ၃,၉၀၉,၉၂၁ ရှိပါတယ်။ အဲဒါကို ၈၀ နဲ့ စားလိုက်တဲ့အခါ ပျမ်းမျှ ပြန့်နှံ့ရောက်ရှိမှု ၄၈,၈၇၅ ရရှိပါတယ်။

ခေတ်နီတိရဲ့ တင်ဆက်မှုတစ်ခုဟာ Facebook အသုံးပြုသူ လေးသောင်းကျော် ငါးသောင်းနီးပါးဆီ ရောက်ရှိတယ်ဆိုတာ ဝမ်းသာစရာပါပဲ။

အဲဒီထဲကမှ စိတ်ဝင်စားတဲ့သူ၊ ဖတ်ရှုနှစ်သက်သူတွေက နှစ်သက်တာ၊ မှတ်ချက်ပေးတာ၊ ပြန်လည်မျှဝေတာ စတဲ့နည်းတွေနဲ့ တုံ့ပြန်ပါဝင်ကြပါတယ်။ အဲဒီလို တုံ့ပြန်ပါဝင်မှုကို ရေတွက်ကြည့်ရာမှာတော့ တင်ဆက်မှု ၈၀ လုံးအတွက် ၂၇၉,၂၈၄ ခု တွေ့ရှိရပါတယ်။ တစ်ပုဒ်ချင်း ပျမ်းမျှ တုံ့ပြန်ပါဝင်မှု ၃,၄၉၁ ခု ရှိပါတယ်။ (ဒီလို တုံ့ပြန်ပါဝင်သူတွေကို သတိပြု ဖတ်ရှုမိသူတွေလို့ ယူဆနိုင်ပါတယ်။)

ဒီတင်ဆက်မှုတွေကို ပရိသတ်တွေနဲ့ အလားအလာရှိတဲ့၊ စိတ်ဝင်စားတဲ့သူတွေဆီ ပြန့်နှံ့ရောက်ရှိဖို့ တစ်ပုဒ်ကို ၁၀ ဒေါ်လာနှုန်း Facebook ကို ခေတ်နီတိက ပေးချေခဲ့ရပါတယ်။ အပုဒ် ၈၀ လုံးအတွက်ဆိုရင် ဒေါ်လာ ၈၀၀ (လက်ရှိကာလ ငွေလဲနှုန်းနဲ့ဆိုရင် ကျပ် ၁၁ သိန်းကျော် ) ကုန်ကျခဲ့ပါတယ်။

အဲဒီအတွက် ကျခံသုံးစွဲရတဲ့ ငွေတွေကို တတ်အားသရွေ့ ထည့်ဝင်လှူဒါန်းမယ့်သူတွေ ရှိလာမယ်လို့ တစ်ခါတစ်ခါ စိတ်ကူးကြည့်မိတယ်။ ထားပါတော့။

အဲဒီအချက်အလက်တွေကို ကောက်ယူပြီးတဲ့အခါ အပိုင်းခြောက်ပိုင်းမှာ တစ်ပိုင်းချင်းစီအလိုက် ဘယ်အပိုင်းက လူတွေကြား ပိုပြန့်နှံ့ခဲ့သလဲ၊ ဘယ်အကြောင်းအရာကဏ္ဍကို လူတွေက ပိုပြီး အားတက်သရော တုံ့ပြန်ကြ၊ ဆွေးနွေးကြ၊ ပြန်လည်မျှဝေကြသလဲဆိုတာ ကြည့်ရအောင်ပါ။ တွေ့ရှိချက်အရ ...

“ပွင့်လင်းပြီး တာဝန်ခံမှုရှိတဲ့ အစိုးရ”နဲ့ပတ်သက်တဲ့အပိုင်းက တင်ဆက်မှု ၁၅ ခုဟာ ပရိသတ်တွေထဲ အများဆုံး ပြန့်နှံ့ရောက်ရှိ ခဲ့ပါတယ်။ ဒါပေမယ့် “ဒီမိုကရေစီရဲ့ အနာဂတ်” အပိုင်းက တင်ဆက်မှု ၇ ခုကတော့ ပရိသတ်ရဲ့ ပြန်လည်မျှဝေတာ၊ မှတ်ချက်ပေးတာ၊ နှစ်သက်ကြောင်းပြတာ စသဖြင့် တုံ့ပြန်ပါဝင်မှု အားအကောင်းဆုံး ရခဲ့ပါတယ်။ (အသေးစိတ် ကိန်းဂဏန်းတွေကို အောက်က ဇယားမှာ ကြည့်ပါ။)

အပိုင်းလိုက်

တင်ဆက်မှု

ခေါင်းစဉ်ကြီးများ

တင်ဆက်မှု

(အရေအတွက်)

ပျမ်းမျှ

ပြန့်နှံ့ရောက်ရှိမှု

ပျမ်းမျှ

တုံ့ပြန်ပါဝင်မှု

ပျမ်းမျှ

ပြန်ဝေမျှမှု

အခြေခံ အယူအဆနှင့်

မူဝါဒများ

၁၆

၃၆,၀၄၂

၂,၂၆၅

၃၄၀

လူတို့ရဲ့ အခွင့်အရေးနဲ့

အခြေခံကျတဲ့

လွတ်လပ်ခွင့်တွေ

၁၂

၄၃,၇၃၆

၃,၀၆၀

၃၁၇

လွတ်လပ်မျှတတဲ့

ရွေးကောက်ပွဲတွေ

၁၉

၄၄,၄၉၃

၂,၇၈၇

၂၈၀

ပွင့်လင်းပြီး

တာဝန်ခံမှုရှိတဲ့ အစိုးရ

၁၅

၆၇,၈၃၃

၄,၅၅၄

၆၃၇

ဒီမိုကရေစီနည်းကျ လူ့အဖွဲ့အစည်း

၁၁

၅၂,၃၄၄

၄,၁၂၂

၄၁၅

ဒီမိုကရေစီရဲ့ အနာဂတ်

၅၂,၈၂၅

၅,၆၇၆

၃၆၂

Last updated